Bakgrunnen for studiet er at Høgskolen i Lillehammer (HIL) og Høgskolen i Gjøvik (HIG) har som mål å auke talet på innreisande utvekslingsstudentar. Då er det ein føresetnad at det blir lagt til rette for mottak av desse studentane.

Internasjonalisering av høgare utdanning
Internasjonale studentar krev meir oppfølging enn norske. Dei skal bli kjende med ein ny studiestad, med eit nytt land, ein ukjend kultur og eit framandt språk.

Integrasjon med norske studentar er derfor ein kritisk suksessfaktor. Ei velfungerande fadderordning er eit tiltak som kan hjelpe til at dei blir betre integrerte.

Fadderordninga gir dessutan norske studentar høve til å engasjere seg i internasjonaliseringsarbeidet ved høgskolane. Internasjonalisering av høgare utdanning inneber at:

• studentar får høve til å ta eit delstudium i utlandet.
• at studia og studentmiljøa lokalt på høgskolane blir internasjonaliserte (Internationalisation at Home).

Målgruppa for studiet er studentar ved HIL eller HIG som ønskjer å engasjere seg i internasjonaliseringstiltak ved å stille opp som fadrar for internasjonale studentar.

Det blir føresett at dei har fullført minimum eitt semester ved ein av dei to høgskolane, og at dei har gode munnlege kunnskapar i engelsk.