Sosial- og helsedepartementet har initiert den nye vidareutdanninga som del av Opptrappingsplanen for psykisk helse. Det nye utdanningstilbodet startar opp som toårig samlingsbasert deltidsutdanning ved HiL og ni andre høgskolar.

Studiet skal vere praksisnært og knytte saman teori- og praksisfeltet i eit helsefremmande perspektiv. Målet er både personleg kompetanseheving og lokalt utviklingsarbeid.

I direkte arbeid med barn og unge
I studietida skal studentane vere i direkte arbeid med barn og unge i minst 50 prosent av jobben. HiL har inngått avtaler med kommunar om at studentane får arbeide med relevante oppgåver som del av studiet, og gir på si side studentane grupperettleiing i kommunen/regionen.

Målgruppa er tilsette i arbeid med barn og unge med minst tre års høgskoleutdanning og minst to års yrkespraksis frå arbeid med barn og unge frå barnehagar, skolar, sosial- og helseteneste, barnevern, politi og kultur- og/eller fritidssektoren.

Tverrfagleg samansetjing
Både kommune-/regiongruppene og heile kullet ved HiL har fått ei god tverrfagleg samansetjing. Samanlikna med dei andre høgskolane har HiL fått spesielt god søkning frå vernepleiarar.

Storparten av studentane kjem frå Oppland, fordelt på kommunegrupper i Gjøvik, Lillehammer, Søndre Land, Vestre Toten og regiongrupper i Gudbrandsdalen og Valdres. I tillegg kjem ei kommunegruppe frå Akershus (Nittedal) og ei interkommunal gruppe frå Buskerud (Hemsedal/Hol).